Num 25 | ZomZIV | STEP | Shittim ah Israel a om laitakin pasalte, amau pasiante bia dinga a sam Moab numeite tawh

Numbers 25

Moab in Israel Zol

1 Shittim ah Israel a om laitakin pasalte, amau pasiante bia dinga a sam Moab numeite tawh 2 numei le pasal paktat ding a kipan uh hi. Mite in ne in amau pasiante mai-ah a kun uh hi. 3 Tua bangin Israel in Peor a Baal biakna a biakpih hi. Tua ciangin amaute tungah TOPA hehna a kuang hi. ^a

4 TOPA in Moses kiangah, “Hih mite makaite khempeuh paipih inla Israel tunga TOPA hehluatna a kipelh theih nadingin amaute that inla, TOPA mai-ah suntangpi in amaute pholak in,” a ci hi. ^b

5 Tua ciangin Moses in Israel thukhente tungah, “Note in Peor a Baal a biakpih na mite uh khat ciat na that ding uh hi,” a ci hi.

6 Kikhopna Puanbuk lutna-ah amaute a kahkah laitakun Israel-te pasal khat in Moses le Israel mihonpite muhin Midian-te numei khat a innkuanpihte kiangah a ciahpih hi. 7 Siampi Aaron’ tapa, Eleazar’ tapa Phinehas in a mu hi; amah in a khutah teipi khat tawi kawma mihonpite nusia-in 8 Israel mipa a puanbuk sung dong a zui hi. Amah in amaute gel - Israel mipa pailetin tua numei pumpi zong a dawtlet suak hi. Tua ciangin Israel-te thuak pulpi a veng hi; 9 ahi hangin tua pulpi-a si mi 24,000 a pha hi. ^c

10 TOPA in Moses tungah, 11 “Siampi Aaron’ tapa, Eleazar’ tapa Phinehas in Israel tunga ka hehna a damsak zo hi; ahang in, pammaih ka sakna hangin amaute ka beisak loh nadingin, amaute lakah kei pahtawina kei amm zahin a amm hi. 12 Tua ahi manin ama kiangah gen in, amah tawh kilemna thukhun ka bawl khin hi. 13 Amah le ama suante in siampi hihna a kip thukhun nei ding uh hi, bang hang hiam cih leh amah in a Pasian a pahtawina-in pammaih sa-in Israel-te ading thoihdamna a bawl hi,” a ci hi. ^d

14 Midian numei tawh a kithat khawm Israel mipa min Simeon innkuan-a makaipa Salu’ tapa Zimri ahi hi. 15 Midian-te a kithat nu min Midian-te innkuan pana beh ukpi Zur’ tanu Cozbi ahi hi. ^e

16 TOPA in Moses tungah, 17 “Midian-te galbawl inla amaute that in; 18 bang hang hiam cih leh Peor thu le Peor-a pulpi a tunna hang a kithat Midian-te makaipa tanu amaute sanggamnu hangin nang hong khemin hong galneih uh hi,” a ci hi.